بلدنا حبابا:
مرحبتين بلدنا حبابا ٭٭ حباب النيل حباب الغابة
ياها ديارنا نحن احبابا٭٭ نهوى عديلا نرضى صعابا
٭٭٭
نعشق شمسها الحرَّاقة ٭٭ تلهب في النفوس دفَّاقه
نحن شعارنا حب وصداقه٭٭ للناس الصفت أخلاقا
٭٭٭
نحن بلدنا نتحدَّابا ٭٭ بي خيرا الوفير وشبابا
لو ننهض جميع بصلابة ٭٭ ما بتلقونا تاني غلابه
٭٭٭
نحن بلدنا بي خيراتا ٭٭ البلد البتشبها ياتا
هِيَّ حياتنا واحن حياتا ٭٭ مادايرين بلاها وحاتا
٭٭٭
في جوف أرضها المأمون ٭٭ كم من سرّ خفي ومدفون
لو نعمل حياتنا تكون ٭٭ تقدُّم وازدهار مضمون
٭٭٭
بسواعدنا راح نبنيها ٭٭ أبداً ما بنفرِّط فيها
لو قبَّلنا من واديها ٭٭ من وين تاني تلقى الجيهه؟
٭٭٭
نحن بلدنا طيبة أصولا ٭٭ جود وشهامة.... رأي ورجوله
بتَّنا راسيه ما مبدوله ٭٭ راقيه مهذبة ومسؤوله
٭٭٭
في أخلاقنا في عاداتنا ٭٭ إشراقات تميِّز ذاتنا
نحن حميده سمحة صفاتنا٭٭ من أجدادنا لي أبواتنا
٭٭٭
ما نقول القديم بطال ٭٭ نقوم نرميه بالإهمال
صحيح مرات نكال ووبال ٭٭ لكن في البسُتر الحال
٭٭٭
وما نشوف الجديد لماع ٭٭ نقوم نبراه بالإجماع
مرات ببقى فيه نفاع ٭٭ ومرات للشعوب ضيَّاع
٭٭٭
نمسك في القديم كان زين ٭٭ ونخلِّى الجديد كان شين
مش بس نمشي عميانين ٭٭ تقودنا الناس شمال ويمين
٭٭٭
لازم نبقي سمحين سيرة ٭٭ وطنيه وأمانه وغِيرَه
نحن بلادنا بينا مصيرا ٭٭ وين من غيرنا تلقى نصيرا؟
٭٭٭
حق الدولة يا هو اللينا ٭٭ حِفْظُو أمانة في عينينا
قولة: أنا مالي حاجة مشينه ٭٭ لا تشرِّفنا لا بترضينا
٭٭٭
والواحد بدون تقصير ٭٭ للضيف يظهر التقدير
وبرَّه بلادو يبقى سفير٭٭ تطراها الشعوب بالخير
٭٭٭
نخلص ونمشي بي روح واعيه ٭٭ لي وحدتنا دايماً داعيه
زي كل الشعوب الساعيه ٭٭ لي سمعة بلادا مراعيه
٭٭٭
بس من غير وفاق وسلام ٭٭ تب ما بنمشي لي قدَّام
أعملوا للغد البسّام ٭٭ مايكون بس عملنا كلام
٭٭٭
أضاف حسن خليفة العطبراوي ثلاثة مقاطع منها المقطعين التاليين:
في تاريخا ما في مثيلا ٭٭ بي درقا وسيوفا وخيلا
نتحزم بلدنا نشيلا ٭٭ دون أفكار علينا دخيله
٭٭٭
بظل الوحدة اتظلِّينا ٭٭ ولي كل العقد حلينا
متشابكات جميع إيدينا ٭٭ وبنتمِّم جميع ما بدينا
٭٭٭
